Niarina indray ny fanjifana herinaratra tao Shina tamin'ny tapany voalohany tamin'ny volana Aprily raha oharina tamin'ny taon-dasa, satria manomboka miarina tsikelikely ny toekarena tratran'ny coronavirus miaraka amin'ny fanalefahan'ny firenena ny fepetra henjana noraisina hiatrehana ny valan'aretina.

Niakatra 1.5% ny fanjifana herinaratra tao amin'ilay firenena faharoa lehibe indrindra eran-tany tao anatin'ny roa herinandro voalohany tamin'ny volana Aprily raha oharina tamin'ny herintaona, raha nitombo 1.2% kosa ny famokarana herinaratra, hoy ny mpanao drafitra nasionaly tao anatin'ny fampahafantarana ny Alatsinainy.

Nidina 4.2% ny fanjifana herinaratra tany Shina tamin'ny volana Martsa ary nidina 10.1% tamin'ny Febroary raha oharina tamin'ny herintaona, satria nametraka fameperana henjana tamin'ny dia sy ny asa fandraharahana ny manampahefana mba hifehezana ny fihanaky ny valanaretina mitovy amin'ny gripa, izay hita voalohany tao afovoan-tanànan'i Shina, Wuhan.

Nitatitra ihany koa ny Vaomieran'ny Fampandrosoana sy ny Fanavaozana Nasionaly (NDRC) fa nihena 6.8% ny famokarana herinaratra manontolo tamin'ny telovolana voalohany raha oharina tamin'ny herintaona. Anisan'izany ny famokarana herinaratra amin'ny alalan'ny hafanana sy ny famokarana herinaratra avy amin'ny rano izay nihena 8.2% sy 9.5% tsirairay avy, raha oharina tamin'ny taon-dasa.

Ny fihenan'ny fanjifana herinaratra dia nampidina ny vidin'ny arintany, izay solika be mpampiasa indrindra amin'ny famokarana herinaratra any Shina, ho 498 yuan ($70.38) isaky ny taonina tamin'ny Zoma, nidina 11% hatramin'ny fiandohan'ny taona.

Tombanan'ireo manam-pahaizana avy amin'ny vondrona mpandinika indostrialy, ny China Coal Economic Research Association (CCERA), fa 870 tapitrisa taonina ny fanjifana arintany nataon'i Shina tamin'ny telovolana voalohany, nidina 60 tapitrisa taonina raha oharina tamin'ny herintaona. Anisan'izany ny fihenan'ny fangatahana arintany eo amin'ny sehatry ny herinaratra fotsiny, efa ho 50 tapitrisa taonina.

Miaraka amin'ny fiakaran'ny fanjifana arintany sy ny famokarana herinaratra, nahatratra ny fara tampony tsy mbola nisy toy izany ny famokarana arintany tao Shina tamin'ny volana Martsa izay 340 tapitrisa taonina, araka ny nasehon'ny Birao Nasionaly misahana ny Statistika tamin'ny Zoma.

Loharano: Reuters